[LOCKDOWN ENGGAU MR BUT TEKURA]
JERPEN PANDAK DIKARANG JABAH ROWLINS 💕

Aku Rissa tauka nama sebenar aku, Marissa Penganan Anak Bo. Pasal nama aku enda ibuh lah nuan ka ketawa. Ti enggai mulut nuan kusegul ngena cawat basah.

Tengahari nya, aku ka begiga ke rumah sewa laban enda ulih diau ba hostel agi. Nyadi semester ketiga tu kami mesti berdiri ba kaki diri empu tauka ko laut berdikari ngiga rumah alai ngenduh.

Aku student taun ketiga ba Swinburne. Ah, malasla aku ka nyerita lebih-lebih. Nyau angat aku bediri ba kaki lima tu nganti grab ke sangkai ngambi aku. Bepuputku ngena kutak ke dibai aku tadi. Chipitka aku mata. Bisi kerita Myvy chura putih parking begadai-gadai ba depan aku.

"Sorry ah, saya lambat. Jalan ada sikit jem."Ko apek bansa Cina nyak madahka aku.

"Hmm, tak apa. Saya pun baru tunggu sini."Ko aku madahka apek Cina nyak. Kebendar ia nyauka setengah jam aku nganti ba diak. Ka kemik, ka birak tat ke ja mih. Enda ngawa. Udah nepan grab legi aku malas dendam. Sigi beri aku setengah siti bintang aja legi. Nyau mih kami duai apek cina nya mupuk ngagai location ke deka aku lawa nya.

*****

Duluh puluh minit udah ngelaban jam jalai alun baru sangkai ba depan rumah ke deka disewa aku nya. Ko kaban aku Lenny Sengayuh ditu mih endur nya. Suaku tambang grab RM5 ngagai apek Cina nyak tadi.

"Thankyou amoi. Nanti bagi star sama saya ha."Apek cina madahka aku. Anggukka aku aja pala. Udahnya, nyau iya pulai ari nya ninggalka aku gegilau kediri ba depan rumah sewa nya tadi.

Kira lima minit aku beranti ba depan gate, bisi kerita Alza chura chelum mansang ngagai aku. Udahnya, pansut siku laki ari kerita nyak tadi. Umur kira-kira 20-an mih. Agi nembiak mat.

"Kitak dah lama tunggu kamek? Sorry ah, kamek busy sikit tek. Kamek anak owner. Bapak kamek sik dapat datang sitok. Kitak mok nyewa sekali ngan kawan kitak nak? "Iya nanya aku.

"Aok. Kamek lah ompuan nak chat kitak marek. Kawan kamek agik di kampung nun. Minggu sigek baru nya balit sitok."Aku malas jaku iya.

"Oh. Ah ju kamek nunjuk kitak bilit kitak. Marek kamek ada madah pasal deposit ngan sewa sekali nak? RM500 sekali ngan deposit oh."laki nya muka kunchi pintu gate.

"Okey."Pandak jaku aku.

Tunjuk iya bilik kami duai Lenny. Umbas iya besai gak.

"Okey sik? Tok bilit untok dua orang sekali. Kitak sign agreement sitok lok."

Empai aku madah okey ke enda, alu baka nama gak anak tuan rumah tu. Ambiku pen ke disua ke iya. Sainku tandatangan ketanda agreement. Udahnya, sua ka aku duit RM500 ngagai iya. Alu tampak mua apai laki nya.

"Tok kunci kitak oh. Eboh riso. Semua benda dalam tok dah completed. Ada TV, ada washing machine, ada peti sejok. Mun kitak ada masalah, kitak boleh call or chat kamek oh. Hujung bulan mun mok baya, bank in ajak sebab kamek jarang di sitok. Kamek kerja di luar Sarawak."

"Okey."Aku nadai mayuh jaku laban lelak berangkut barang. Agi sesengah narit seput.

"Sampah buang dikpun. Pandeylah kitak ngemas rumah tok. Gate kunchi oh. Sitok bahaya mun sik kunci gate. Apa-apa barang hilang kamek sikmok nanggung. "Udah bejaku-bejaku, iya keluar. Sesebun pansut ari rumah.

Udah laki nya pansut, jejalik mataku meda utai diak. Peresaku utai ke dapur. Beresi dapur. Sampah nadai. Stove dilap manah. Pinggai mangkuk tesusun manah. Eh ,bisi pinggai? Ukai laki nya tadi madah agi nadai urang diau ditu ka? Maya aku agi berunding diak aku tesium ke bau but. Ta nimpuh maya dipuput ke ribut. Tilik ku sepiak endur urang engkah mesin basu. Mulut besai leka mataku meda tekura dua iku benung ngerayap ba tail. Kekerup makai kangkung. Ai but nya menchichir ba tail. Piii! Kamah mat! Silaka.

*****

"Rissa, bedau ku pulai seminggu tok laban nadai gik bilun enggau bas laban covid tu."Lenny bejaku dalam telipun madahka diri enda ulih pulai laban Perintah Kawalan Pergerakan (PKP) udah setat. Enda memunyiku. Au-auka ku aja mih utai ko Lenny. Nadai daya. Berserah ngagai Tuhan aja ku. Udah gak aku tu buyan mat diau kediri.

Udah berandau enggau Lenny, padamku telipun. Ka keluar ku laban rekung nyau ikak. Maya ka nambit pintu, diak pending aku ninga urang benung mandi ba jamban. Aie sapa nyak? Asaika engkajat keluar atauku mayatu. Dup dap dup dap!

Nyauku nyubuk belalai ba tisi dinding. Engkahku ba mua pintu jamban gak pending. Nai, amai bisi urang mandi ba diak! Enda mukai-mukai pintu jamban dibuka urang ari luar. Laban ta tekenyit nyerauh mih aku. Iya mega tekenyit tang agi selamba.

"Perugul! Perugul!"Aku nyau reradak ambis teterap tetingkap. Bup! Baka buah nangka but aku labuh ba depan iya. Udah gak tubuh sigi ta ka gegeduk mimit. Melapik aja mih. Enggai aku nyerah diri. Udah labuh aku angkat baru taja nyau kejingka. Burit gak asaika meletup. Datai di bilik alu tambitku rat-rat pintu. Ambis selutip segulung kena aku ngenan ke pintu. Akai, nadai virgin agi mataku tu! Titik ku eyemo ba mata kena muai bala sitan ke udah begitang diak tadi.

*****

DAY 1 💕

Dani aku pagi kira-kira nyau ka pukul sepuluh pagi. Sigi udah tawas. Mata panas nyau udah tinggi atas pala. Angkat ku belubah. Peda ku talipun. Berita pasal Covid-19 nyau makin nyadi. Makin mayuh urang kena jangkit. Malaysia udah bisi kes mati keterubah. Ari jemaah Tabligh nyak. Garuku pala. Bendar aku ngingat nama utai ke nyadi kemari. Namahal selutip kuning nyau melintang kin-kia ba pintu ku tu?

Bukaku pintu. Bendar aku muka selotep ba pintu. Silakku pintu. Maya ka nyilak ke pintu, pintu bilik ke betentang enggau bilik aku nyak pan sama tebuka. Klak! Enda bebaju semina ngena boxer aja uchak.

"Eh, eh. Dik sapa? Nama dik bisi dalam rumah aku? Owner rumah tu madah aku siku aja udah masuk rumah tu."Mulutku alu lanchang nganu iya. Embal ka aku sengapa bejaku Iban enda ngira iya bansa nama. Ka ke bansa Tambi. Tang enti peda ari gamal, sigi bansa kitai. Kulit aja putih udahnya beragum. Tang enda gak nyau repak baka sabat. Tubuh bisi sixpack engka sigi urang kuat main gym tauka makai supplement. Enda kapa aku kiruh mikir ke utai dadak baka iya nya!

"Dik sapa?" Ko iya gak nanya aku baru.

Aik, sama Iban? "Aku nanya dik tadi. Tanya aku bedau disaut dik. Anang-anang dik tu ke nupi tekura. Kemari aku nuchi ai but tekura dik nyak. Kamah mat pendiau mensia baka dik tu! Rumah baka tu sigi enda ulih nupi tekura wai. Enti ka nupi tekura, ba rumah diri empu. Anang ba rumah suwa!"

Cie, angat mat lintan ku meda gamal iya nya. Mua aja sigat tang kamah. Babu!

"Tu rumah aku. Peneka aku mih ka ngaga nama. Siti agi, aku nadai kala nyewa rumah tu. Rumah tu sigi rumah aku. Kadang-kadang bisi madi aku ditu laban asuh aku meda rumah tu. Iya sigi selalu mai indu kitu. Ku nanya dik baru, dik sapa?"Kasar tanya iya.

Majak iya madah-pemadah tu rumah iya.

"Rumah dik? Dik nadai kala nyewa rumah tu? Okey, aku call owner rumah depan mua dik!"Aku merak mua iya. Keluar ku telipun ari kuchik baju tinduk. Udah gak mayanya nadai ngena baju dalam. Tetuchum kediri mih iya ba depan aku. Tutupku ngena tula mit dada aku. Kelintu ka aku mua iya. Kanji mat!

"Helo?"Tut... Padam ke owner rumah nya telipun iya. Enda puas atiku. Call aku baru alu enda ulih agi. Alu block iya ari whatsapp lumur aku tekala nya. Cibai! Anang-anang aku tipu owner rumah tu kemari! Ka nyabak asai tang tat ke aku aja. Taja darah udah begirau, gagaku selamba mua aku. Takut ke laki tu ketawa ke aku legi.

"Iya nadai nyaut. Legi aku call iya baru."

"Aku ka meda bukti dik ngempu rumah tu. Ni bukti dik indu?"Pulai ke iya agi ka nganu aku. Mirah mua iya. Okey, tamaku dalam bilik. Baiku surat agreement kemari. Empas ka aku ba tapak jari iya. Pap!

Lama diri iya bebacha ke utai diak. Ney, lapa dik dih? Rumah tu sigi rumah suwa aku enggau Lenny! Bekerandut dada aku ngasaika diri udah ka menang ngelaban iya.

"Nama dik lelesey dih? Kan aku madah tu rumah kami duai kaban aku. Dik tu ke nyerak ditu! Kami duai kaban aku enggau enggai serumah enggau urang laki. Kelebih agi mensia kamah. Udah kemik birak enda nemu flush! Eeew yuck."Tinggi jaku ku agai iya. Ambi iya sedar diri empu.

"Nama dik amai ketu?"

"Bah, sapa agi dih enti ukai nama aku? Nama ibuk dik? Nama inik dik? Nama aki dik?"

"Patut nama dik Penganan anak Bo. Aku ka madah ke dik Miss Penganan anak Bo. Rumah tu rumah aku. Urang ke nyewa ngagai dik nyak kemari,madi aku. Enti dik enda pechaya aku call iya diatu."

Ambi iya talipun iya dalam bilik iya empu.
Beri iya loudspeaker ambika aku ninga sama. Tunga iya depan mua aku talipun iya. Video call seduai. Melut besai mata aku. Nembiak nyak mih ke nipu aku kemari! Biak-biak udah nyadi scammer.

"Dini dik?"

"Ba rumah pangan ku tu. Nama dih?"

"Nama bisi indu gila meroyan dalam rumah ku tu? Nadai kala ku nyewa rumah tu ngagai urang. Anang pandai-pandai dik. Dik ngemula ke iya. Berik baru duit indu nya palui!"Ko iya nganu madi iya.

Aku kumbai iya indu gila! Pedis ati.

"Aku ka ngena duit tu. Urgent—"

"Woi, kenak ko bulak aku?! Berik balit duit aku ya! Kinek! Sebelum aku report polis ko tok udah bulak aku! Aku viral ko ya kelak!" Perakku. Sesabak aku nesal nadai mih guna. Talipun pan alu dipadam madi iya.

"Sorry miss. Madi aku tu sigi selalu ngemedis ke untak kami. Okey, aku—"

"Padah ngagai madi dik nya, aku ka duit aku diatu!"Baka urang tuyu aku belaya enggau iya. Sapa enda ngerinsa. Udah gak puk bulan tu, tambah gak PKP udah setat. Merinsa nyawa aku ketu. Enti madi udah nyadi scammer, iya lebih agi kini.

Utai ke udah susun aku ba dapur kemari ambiku magang. Bala sida mee, sida kupi, sida milo , bicing ,garam, gula, kicap ambiku magang. Enggai ke iya makai utai aku. Enda alah kitai bebeli ke utai bebelama. Tepu ku dalam bilik magang utai pakai ku. Enda memunyi iya meda aku sesipa sebelah nya betaban ke utai. Semina giling pala aja.

"Dik anang makai utai aku. Anang ngena umo tauka sabun aku. Anang ngena pinggai aku. Tekura dik nyin, pama lepas baru ku tunu nyak ila. Pama udah mandi, mup tail. Kami ke terap laban tail basah. Pama udah makai, pinggai basu! Anang nenugung ke utai ba sinki. Insap anang muai ba mangkuk jamban. Pama dah kemik, cuci jamban! Enti ngasaika diri kemik bediri, maya kemik anang gegilau. Nyau ambis ai kemik kena dinding. Nemu dik?"

"Dik sapa ka ngaga rules bakanya? Dik bini aku? Ila aku mai madi aku kitu dih mulaika ke duit dik baru."

"Enggai! Aku enggai ninga jaku dik. Aku enda pechaya ke scammer baka kitak sebilik. Dik ka aku ngaga nama? Ngiga rumah bukai? Dik enda nemu nama utai nyadi diatu? Diatu udah lockdown! Keni aku ka ngiga rumah gik?!"

"Ba rumah kaban dik?"

"Aku tetap diau ditu seagi madi dik enda kitu mayar duit aku!"

"Okey, aku ka meda sampai ni dik ulih diau ditu enggau aku. Udah gak enda ulih keluar rumah. Enti pencegah maksiat tama kitu, anang nyalahka aku! Jadi enggau aku mih dik, indu gila. Enda ibuh ka tinggi jaku bakanya. Mua nadai gak bajik. Mua baka engkarung tuai."Iya malas jaku aku. Ngelebus pia ka ngelantak dulu bau aku. Nyau tepawir ke belakang mimit tubuh aku.

Dik gumbai gamal ku baka engkarung tuai? Gamal iya baka ke sigat mat. Enti ku nyema, sigi enda ulih sema enggau utai lalu. Empa penyaie iya nya.

******

DAY 4 💕

Empat ari kami duai enda betanya. Pama bepansa sebelah bilik sigi kelintu ku belama mua iya. Udah ku berapi ba dapur, aku bisi idea jaie. Engkah ku minyak ba tail minit-mimit. Tamaku kebilik. Udah datai ba bilik, pansut iya. Sipa-sipa sebelah luar diak. Enda mukai-mukai , pendingku nangkap bunyi meredup ba luar din. Engkakah ku ketawa diri. Sepik asai. Arinya aku terap dua kali ba pintu jamban laban ketegal tail basah. Enti ribat ,sigi gugur. Dasar mensia bangka enggau tetaik.

*****

DAY 5 💕

Gidanku dalam bilik. Udah manah gari aku rangkai ba penyidai, sekali empit ke iya enggau gari basah. Gari dijembui agi beteritik. Pinggai ba dapur sengaja iya enda nuchi. Bakaka sengaja ka ngasuh aku nganu. Ba luar rumah bisi siti motosikal kawasaki ninja engkah urang diak. Pancitku tayar. Udahnya memuchau kediri iya ba luar diak laban enda ulih keluar ka meli barang ketegal moto pancit. Nasib ku enda manchit ke tayar kerita. Udah gak ka amai pansut. Pulis enda nangkap iya.

*****

DAY 7 💕

Dani tinduk lemai nyak, nyaris bunyi speaker iya. Ketegal lagu iya aku tedani. Sesebingau pala. Entap ku ba dinding pending. Setahu ukai lagu ditebah iya. Nyau beah-ah, ike-ike kimochi utai nyak diak! Puih, mensia ka parai tang enda gak peparai. Besai ke iya agi speaker ninga aku mandam pintu.

"Laki gila seks! Enti ka meda pan, agak-agaklah. Anang ngasuh seluruh dunya nemu kitai meda! Palui! Kamah! Antu enggai negam dik nya. Umur aja tuai tang pendiau baka bedau disunat."BAM! tendang ku pintu bilik iya. Annoying mat.

*****

DAY 9 💕

"ARGHHHHHHHHH! STRESSSS!"Nyerauh ku dapur. Cawatku ku kena iya ngelap periuk! Ngelap utai ba dapur diak! Udahnya, siti da dress aku kena iya ngelap kaki. Engkah iya ba tisi pintu bilik iya. Patut ku meda gari ke dijembui aku ba luar din kurang. Ketukku pintu bilik iya. Pandamku pintu bilik iya. Bam! Bam! Pansut iya baru bilik enggau mua memusu baka udah ke rugul manuk.

"Dik ngereja ke utai aku!"

"Ngereja nama? Aku nadai ngaga utai pan. Ngachau dik enda gak aku. Bisi ku nyubit dik, nyipak dik? Enda kala ngachau pengidup dik."

"Aku ka nemu nama utai enda puas ati dik ba aku? Sembilan ari aku diau ditu, dik sigi selalu ngemedis ati aku!"

"Ati dik ukai ati aku ti pedis. Dik ke pedis ati meda aku. Enti dik enggai meda aku, keluar dik ari rumah tu. Enda ku begulai enggau bayak idup baka dik."Tangkap iya jariku. Irit iya keluar rumah.

"Keluar dik! Pedis pending ku ninga dik reradak dalam rumah aku."Ko iya muru aku.

"Dik ngena gari aku kena ngelap utai!"

"Ni ku nemu!"Iya ngelaban aku.

Dieju ke iya keluar tubuh aku. Kunchi iya pintu. "Diak dik! Reradak diak jak. Indu sut. Mangah enda bagi ngau urang."

Laban ke ego, enggaiku nunda iya. Eh, dik ingat aku merempat mat ka diau dalam rumah dik? Enda ngarap rumah dik endur diau maya kubit tu.

******

Peda ku jam bisi lima jam kini aku udah diau di luar. Bangkai mat laki tu! Ngelanjur. Enti ku kena kubit, mua dik dulu ku ludah. Ari gak nyau majak silau. Nyamuk din diak nutu. Buyan mimit gak aku diau di luar tu. Nadai kerita mansa jalai. Kangau ku ari jenila nadai gak iya nyaut. Amai nadai guna laki tu!

Pukul 9 malam—agi nganti ba luar.
Pukul 10 malam—agi nganti ba luar.
Pukul 11 malam—agi nganti ba luar.
Pukul 1.30 pagi—agi nganti ba luar.

Nadai mandi, nadai makai nyau gerusu mua aku. Mataku makin ngantuk. Ka tetelap aku ba tisi pun bungai. Ketu asai nyadi pengemis nih. Enda ngawa, pegila aku tetap keluar ari rumah tu.

"Oi, indu gila." Mr but tekura nempap kening aku ti ka labuh. Lelanuk mataku merening iya.

"Nama enggai tama dik? Enti enggai tama, alu diak mih dik sampai pagi. Ditu kumbai dik enda mayuh urang minyak ngiga indu."Ko iya ngindui ka aku.

"Enda ibuh dik sibuk pasal aku. Ni ko aku mih kena rugul urang minyak ari diau enggau mensia jaie lintan baka dik."Labuh ai mataku.

"Aku enggai belaya enggau dik. Ka tinduk. Ti dik sakit pegila, aku ke tusah. Sepital ukai ka nerima. Benung sibuk diatu."

"Ni ko aku mih. Ka sakit. Ka mati. Dik sapa ka irau ke aku? Dik nyak mih munsoh aku dunia enggau akhirat!"

"Anang lawa dik. Ila dik ensepi labuh pengerindu ngagai aku. Anang madah benchi. Enggai ke dik jadi enggau aku ila."

Pereningku gamal iya ke lelinsum nyak. "Aku lebih ka kawin enggau jelu ari kawin enggau mensia tuyu baka dik."

"Aku Max. Max Sebastian."Ko iya.

"Nadai nanya pan."Enda ku sambut jari iya.

"Madah. Mali pia? Ambi ke dik nemu nama bakal laki dik."

"Enda beminat."

"Aku ke beminat enggau dik."

"Eww."Tepisku jari iya.

"Dik ka tama ke enggai?"

"Enda."

"Okey."Katung iya tubuh aku tama rumah. Rerauh iya aku laban tekenyit udu. Urang sepiak rumah nyau pansut mih sangka urang ngerugul indu. Tambit Max pagar enggau pintu.

******

Day 10 💕

Tilikku ari jenila. Max baru sangkai ngena kerita Honda Civic iya. Kadang alit gak ati aku nama enda pengawa Max sampai ulih meli kerita mar. Besai nyawa Max bakaka nganu urang.

"Ni duit ambi dik arinya? Kitu! Ngemalu bansa mat dik tu!"Irit Max masuk ke dalam rumah madi iya. Tama dalam rumah seduai iya. Perak Max baru madik iya.

"Berik gai iya. Dik tu , bedau ku ripot ngagai pulis dik tu."Baka ngnu anak mit Max nganu madi iya.

"Au mih!"Keruk madik Max kuchik tanchut alu sua ke iya RM500 ke ambi iya lebuh nya. Belubah ku nyambut. Nadai bejaku ku.

"Palui!"Dieju ke Max tubuh madi iya.

"Sorry kak. Aku amai-amai beguna duit maya nya. Aku alah main game."Madi Max minta ampun ba aku.

"Nya kitai anang balat main judi! Tuyu."Max nganu baru.

"Pulai dik!"Buru Max. Pansut madi iya ari rumah. Nyetat injin motosikal iya alu mupuk ari endur nya.

*****

DAY 12 💕

"Tu rumah kaban dik?"Max nyangkaika kerita iya ba depan rumah Sally.

"Auk. Ditu mih."

Mambam mua aku. Enda nyamai mat asai. Ka nyabak diak. Palikku ku mua Max.

"Nama dik alu enda bejaku ari tadi? Meda ngelamatu nyau bunyi burung semalau. Udah gak mangah."

"Nadai. Pulai jak dik. Legi ku ngagau ke Sally asuh ngangkut barang. Bye. Stay at home."

"No, stay at heart."Ko iya.

Kami duai bepalik lama. "Udah lah. Thankyou udah numpangka ke rumah dik maya pkp tu."

"Anang guai."Berik iya siti kad bisnis ngagai aku.

"Call aku legi."

Pedaku kad bisnis iya.

◆MAX SEBASTIAN
◆ENGINEER

"Okey." pansutku ari kerita Max. Kepaiku Max. Maya kerita Max udah bekejang, diak ati aku asaika enda ulih ngasuh Max bekejang ari nyak. Aku agi ka diau ba rumah Max. Lockdown enggau Max! Kendasku ai mata. Genggam ku rat kad bisnis Max,Mr But Tekura...

-AMBIS-
"I hate you, i love you"